يمكن عنده مخ الضبع!

قياسي

كل ما طلعت دعاية واحد من مسلسلات رمضان، أصيبت أختي بارتفاع ملحوظ في ضغط الدم وبدت في سب وشتم الممثل والممثلة والمخرج والكاتب والمنتج اللي تأكد أنه هو نفسه الممثل. مقومات الممثل في الوسامة على قد حاله أضف إلى ذلك انه متين ومكرش وأقرع، يعني على حسب ما تشوف أختي أنه لا يتمتع بصفات البطل الحقيقي، وعشان جيه تقول انه اكيد هو المنتج ولانه المنتج يستغل سعة يده ويرغمهم على إسناد أدوار البطولة له. قلتلها يا حبيبتي المفروض كبرتي على هالتفكير المحدود وان البطل لازم يكون حلو، ترد تقوللي: انزين عاد شكل من شكل، مب كرشة وقرعة وآخر شي كل اللي في المسلسل ميتات عليه! هنيه يكون ردي: يمكن هو ريال طيب، وقلبه حنين ويعرف كيف يتعامل مع الحريم من جيه يكسب قلوبهن. طبعا ما تقتنع وتصر على انه هو المنتج.

 
في جلسة مع يدتي وقريبتي، انفتح هالموضوع بعد ما يبنا سيرة مسلسلات رمضان، ضحكت يدتي على مبدأ أختي وفكرتها، وحكتلنا قصة مخ الضبع، يحكى ان في بلد من البلدان العربية يبيعون مخ الضبع، قطعة منه بحجم حبة الفلفل تساوي ما يقارب الثلاثة آلاف درهم، اللي يشتريها يقدر يملك أي قلب يباه حتى لو كان قلب أميرة، وهالقطعة ما تنإكل ولكن يمسح بها على الحواجب وبمجرد ما تقع عين الفتاة أو السيدة المراد الحصول على قلبها على الحواجب الممسوحات بالمخ تنإسر وتعطيه قلبها بدون مقابل. سألت قريبتي: أحين هاي الحكاية حقيقية ولا مجرد حكاية؟ قالت يدتي: يقولون حقيقية ولين اليوم تصير، عشان جيه يمكن الدب المكرش عنده مخ الضبع. هنيه استحضرت صورته في عقلي عشان أحاول أتذكر حواجبه، هن سود وعراض واحتمال وارد يكونن ممسوحات بمخ الضبع.

 
الحين أفكر لو مخ الضبع كان في متناول الجميع، كانوا اللي جمالهم على قد حالهم ما تعبوا مساكين وشفناهم محاطين بالجميلات، بس خوفي تظنون اذا شفتوا واحد عادي ماخذ جميلة ان عنده مخ الضبع، لا تحطون في ذمتكم، أنا بعدني أؤمن بجمال الروح والقلب الطيب اللي ما يحتاج لا حواجب ولا مخوخ ضباع.

About these ads

7 responses »

  1. عيل مخ الضبع يأثر اكثر عن اعمال السحر والطبوب

    والله فكرة

    على الاقل من يلجأ لهاييلاك يوفر

    على فكرة

    مب بس ابطال المسلسلات معدومي الوسامة

    طالعي الساحرات اللي كل وحده مسويه حق عمرها مسلسل

    ها بدل ماتيلس في بيتها تستغفر وتحج وتصوم ..

    صدق ارذل العمر

    يالله حسن الخاتمة

    ..

    كل عام وانتي صايمة يالطيفة

  2. بس ما خبرتينا يا لطيفة أي بلد هذا اللي يبيعون فيه “مخ الضبع”..

    ما أباه حق الاستخدام الشخصي، لا بتاجر فيه.. في ناس يبالهم و يدورون على مثل هالأمور

    الحمد لله لا مخ ضبع و لا مخ سبع ينفع معانا =)

    و اللي يفكر في هالأمور بيكون ما عنده مخ بالأساس، فيحتاج يعوض النقص اللي عنده،و اللي يطيح قلبها له تكون مثله ناقصة عقل =)

    الكشخة كشخة الروح..!!

    بس كشخة المنتجين الأبطال تكون بالفلوس و السلطة و ما يبالهم لا مخ *** و لا هم يحزنون

    تحياتي لك أختي لطيفة..

  3. عبدالله الحاي::

    اذا هن يلسن يستغفرن، من وين بتينا الذنوب اللي لازم نستغفر عنها؟

    وانت فصيام وقيام أخوي عبدالله =)

    خضر بودقة::

    ما بخبرك واخذ ذنب الخلق اللي بتبيع عليهم

    لول

    الكشخة كشخة الروح هاه =)
    الله يرزقك اياها دوم

    أطيب التحايا =)

  4. من مآثر الضبع عند الدّميري صاحب كتاب الحيوان أنّه من الذين لا يلتفتون إلا بكامل جسدهم يعني لا يملك رقبة ديناميكية يستطيع بها الالتفات بحثا عن فريسته ..

    قد يكون لقوة فتكه بمن هو أكبر منه من الحيوانات كالحمار الوحشي ونحوها رزقه الله تنشيناً واضحا وقدرة على الاستمرار في تصيّد الهدَف دون صَوَارف ..

    من المتوقّع ان يكون مخ الضّبع هذا يجذبُ التركيز على الممسوح به دون غيره فيأسر الرائي نحوه وحده وبذلك يمتلك اهتمامه ..

    وعلى ما سبق فمن يملك (مخ ضبع ودم غزال وبيض ديك وقرن فيل وريش نعام) فقد ملك كنزا من كنوز الحياة والدّنيا ..

    (ما سبَق كان خربطيشن على رأي أخينا عبدالله الحاي فاعذريني)

    من وجهة نظري أن لأختك حق فيما قالت طالما مسلسلاتنا تعتمد على الشكل والوسامة فلماذا يخرج علينا من يفتقدها إلا إذا كان هو المخرج والمنتج والبطل ..

    تحياتي لتشويق في هذه الصّفحة ولك أخت لطيفة ..

أضف تعليق

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

You are commenting using your WordPress.com account. تسجيل خروج   / تغيير )

Twitter picture

You are commenting using your Twitter account. تسجيل خروج   / تغيير )

Facebook photo

You are commenting using your Facebook account. تسجيل خروج   / تغيير )

Google+ photo

You are commenting using your Google+ account. تسجيل خروج   / تغيير )

Connecting to %s